تمغربيت:

اي واحد قرا وثائق الحركة الماركسية اللينينية المغربية (الحملم) اللي جا منها عزيز غالي و كل قيادات الجمعية المغربية, غادي يكون عارف أن قوله أن موقفه(هم) كان دائما واضح فقضية الصحراء هو ماشي صحيح..
الماركسيين اللينينين و خصوصا التنظيم أ : “الى الأمام”, موقفهم كان دائما متذبذب, و فيه خلط متكرر و غبي بين مفهوم الوطن اللي هو ثابت و بين أفعال النظام اللي هي تتغير معه .. مثلا عزيز غالي شاف أن المنتخب المغربي لكرة القدم صهيوني لا يستحق التشجيع ضد منتخب جنوب افريقيا رغم ان المنتخب كيمثلنا حنا كشعب و حتى حد ما مشا فيه طبع مع اسرائيل.
نفس هاد المنطق كان قبل عند القيادات السابقة ..الى الامام ف خريف 1976 ف وثيقة ” هل يشكل سكان الصحراء الغربية شعبا؟” غادي تعتبر ان الصحراء ماشي ديال المغرب حيت النظام المغربي كومبرادوري و حيت الاستعمار احتلها و بعدها على المغرب.
لكن قبل ف وثيقة مثل: ‘اعادة بناء الوحدة الوطنية للمغرب و الصحراء الغربية على أسس ديمقراطية” ديال 1974 موقفهم كان مرة أخرى متغير و قال أن الصحراء و المغرب كيشكلو شعب واحد..
فالفيديو المشار اليه ديال غالي .. برر غالي موقفه مرة أخرى بأن النظام يتفاوض على الصحراء مع خصومه اذن ف هو عنده شك, و ان الامم المتحدة عندها نفس القرار ديالهم اذن هم اللي عندهم الحق ,
هذا منطق فقير حيت الجمعية نفسها تدعوا للجلوس للتفاوض مع نفس النظام حول حقوق اساسية , فهل هي عندها شك فيهم ؟ و الأمم المتحدة موقفها كيحددوه عدد الأصوات و قوة الدولة اللي غادي يصدر ضدها القرار ماشي الحق و الا ف نفس العام ديال اختيار الامم المتحدة لتقرير المصير في الصحراء المغربية هي ما قدرتش تخرج قرار ضد الولايات المتحدة ف فيتنام حيت الدول الغربية رفضاتوا , ف هل نعطيو فيتنام للولايات المتحدة ؟