تمغربيت:

عن حساب طارق القاسمي على منصة إكس

الطوابرية عندنا في المغرب بالنسبة ليهم فاش إيران كتتدخل عبر ميليشياتها في سوريا والعراق واليمن وفلسطين.. هادشي كيتسما مقاومة وماشي تدخل في السيادة وفي إرادة الشعوب وماشي خرق للقانون الدولي.

وفاش إيران كتسلح البوليساريو ضد المغرب، كذلك كيتسما مقاومة وماشي اعتداء على السيادة.

وفاش جنوب افريقيا وفنزويلا وكوبا وغيرها كيدربو ويسلحو البوليساريو هادشي ماشي تدخل في السيادة.. وماشي خرق للقانون الدولي. والجزائر لي هي أصل المصائب كلها بالنسبة ليهم خوتنا ومايخصش نقولو عليهم كابرانات.

وبالنسبة لنفس الطوابرية مادورو هو الممثل الشرعي ديال الشعب الفنزويلي.. ولكن محمود عباس ماشي هو الممثل الشرعي ديال الشعب الفلسطيني. وأيضا بالنسبة لنفس الطوابرية فاش كياخذو من عند ميريكان الدعم المالي لمنظماتهم الحقوقية ويرسلو ليها تقارير معادية ضد المغرب ديك الساعة ماكاتكونش امبريالية توسعية.. وتدخل في الشؤون الداخلية. ولكن نهار ميريكان كتدعم المغرب فقضية الوحدة الترابية كيوليه يهضرو على استقلالية القرار وعلى شنو هو المقابل وحكا المصالح.

وكذلك فاش ميريكان صنعات ما يسمى بـ “الربيع (الخراب) العربي”، ديك الساعة كان سميتها ثورة وانتصار لإرادة الشعوب والديمقراطية و و و.. ولكن مع فنزويلا أو جنوب افريقيا أو إيران كتولي ميريكان امبريالية توسعية متوحشة.

الحاصول..

المغرب بالنسبة للطوابرية ماشي غير آخر حاجة يفكرو فيها وإنما ماحاضرش أصلا فحساباتهم ومنبعد كيبقا فيهم الحال علاش نقولو عليهم خونة وعملاء.